ವರದಿ: ಸನತ್ ಶಿವಮೊಗ್ಗ
ಮಧ್ಯಪ್ರದೇಶ: ಮಧ್ಯಪ್ರದೇಶದ ಅಗರ್ ಮಾಲ್ವಾ ಜಿಲ್ಲೆಯಲ್ಲಿ ಶನಿವಾರ ಮುಂಜಾನೆ ಭಾರಿ ಮಳೆಗೆ ಉಕ್ಕಿ ಹರಿಯುತ್ತಿದ್ದ ಹಳ್ಳಕ್ಕೆ ಕಾರು ಬಿದ್ದ ಪರಿಣಾಮ, ಒಡಿಶಾದ ಏಳು ಭಕ್ತರು ಸೇರಿದಂತೆ ಒಟ್ಟು ಎಂಟು ಜನರು ಸಾವನ್ನಪ್ಪಿದ್ದಾರೆ.
ಒಡಿಶಾದ ಒಂದೇ ಕುಟುಂಬದ ಏಳು ಮಂದಿ ಸದಸ್ಯರು ಧಾರ್ಮಿಕ ಪ್ರವಾಸಕ್ಕಾಗಿ ಉಜ್ಜಯಿನಿಗೆ ಬಂದಿದ್ದರು. ಅಲ್ಲಿಂದ ಮಾ ಬಗಲಾಮುಖಿ ದೇವಸ್ಥಾನದ ದರ್ಶನಕ್ಕಾಗಿ ಟ್ಯಾಕ್ಸಿ (ಮಾರುತಿ ಸುಜುಕಿ ಎಸ್-ಪ್ರೆಸ್ಸೊ) ಕಾರನ್ನು ಬಾಡಿಗೆಗೆ ಪಡೆದು ನಲ್ಖೇಡಾಕ್ಕೆ ಪ್ರಯಾಣಿಸುತ್ತಿದ್ದರು. ಆದರೆ, ನಲ್ಖೇಡಾ ಭಾಗದಲ್ಲಿ ಕಳೆದ 24 ಗಂಟೆಗಳಲ್ಲಿ ಭಾರಿ ಮಳೆಯಾಗಿದ್ದರಿಂದ, ದೇವಸ್ಥಾನದ ಮುಂಭಾಗದಲ್ಲಿದ್ದ ಮಳೆನೀರಿನ ಚರಂಡಿ/ನಾಲೆ ಉಕ್ಕಿ ಹರಿಯುತ್ತಿತ್ತು. ಅದರಲ್ಲೂ, ನೀರಿನ ತೀವ್ರ ಹರಿವಿನ ನಡುವೆಯೂ ಚಾಲಕ ಕಾರನ್ನು ಮುನ್ನಡೆಸಲು ಯತ್ನಿಸಿದಾಗ, ನೀರಿನ ಭಾರಿ ಸೆಳೆತಕ್ಕೆ ಸಿಲುಕಿ ಕಾರು ಸಂಪೂರ್ಣವಾಗಿ ಕೊಚ್ಚಿಹೋಗಿದೆ.
ಮೃತಪಟ್ಟವರಲ್ಲಿ ಮೂವರು ಮಕ್ಕಳು, ಇಬ್ಬರು ಮಹಿಳೆಯರು ಮತ್ತು ಮೂವರು ಪುರುಷರು ಸೇರಿದ್ದಾರೆ. ಚಾಲಕ ಮಧ್ಯಪ್ರದೇಶದ ಸ್ಥಳೀಯ ಟ್ರಾವೆಲ್ ಏಜೆನ್ಸಿಯ ಉದ್ಯೋಗಿಯಾಗಿದ್ದು, ಉಳಿದ ಏಳು ಜನರು ಒಡಿಶಾದ ನಿವಾಸಿಗಳಾಗಿದ್ದಾರೆ.
