ಶಿವಮೊಗ್ಗ: ನಗರದ ನೆಹರೂ ಕ್ರೀಡಾಂಗಣದಲ್ಲಿ ನಡೆದ ಸ್ವಾತಂತ್ರ್ಯ ದಿನಾಚರಣೆಯ ಸಂದರ್ಭದಲ್ಲಿ, ಮಕ್ಕಳನ್ನು ಕಳೆದುಕೊಂಡ ದುಃಖದ ನಡುವೆಯೂ ಅಂಗಾಂಗ ದಾನ ಮಾಡಿ ನಾಲ್ಕು ಜೀವಗಳನ್ನು ಉಳಿಸಿದ ಶಿವಮೊಗ್ಗ ಜಿಲ್ಲೆಯ ಎರಡು ಕುಟುಂಬಗಳನ್ನು ಕರ್ನಾಟಕ ಸರ್ಕಾರದ ವತಿಯಿಂದ ಗೌರವಿಸಲಾಯಿತು.
ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಇಲಾಖೆ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಎಸ್. ಮಧು ಬಂಗಾರಪ್ಪ ಅವರು ಎರಡೂ ಕುಟುಂಬಗಳಿಗೆ ಪ್ರಶಂಸನಾ ಪತ್ರ ನೀಡಿ ಗೌರವಿಸಿದರು.
ಗಿರೀಶ್ ಕುಟುಂಬದ ಮಾನವೀಯ ನಿರ್ಧಾರ
ಶಿರಾಳಕೊಪ್ಪದ ರೂಪಾ ಮತ್ತು ಕುಮಾರ್ ದಂಪತಿಯ 16 ವರ್ಷದ ಪುತ್ರ ಗಿರೀಶ್ ರಸ್ತೆ ಅಪಘಾತಕ್ಕೀಡಾಗಿ, ಚಿಕಿತ್ಸೆ ಫಲಕಾರಿಯಾಗದೆ ಮಾರ್ಚ್ 6, 2026ರಂದು ಬೆಂಗಳೂರಿನ ಕಿಮ್ಸ್ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದರು.
ಮಗನ ಅಗಲಿಕೆಯ ತೀವ್ರ ನೋವಿನ ನಡುವೆಯೂ ಪೋಷಕರು ಅಂಗಾಂಗ ದಾನಕ್ಕೆ ಸಮ್ಮತಿಸಿದರು. ಗಿರೀಶ್ ಅವರ ಲಿವರ್, ಎರಡೂ ಮೂತ್ರಪಿಂಡಗಳು ಹಾಗೂ ಹೃದಯದ ಕವಾಟಗಳನ್ನು ಅಗತ್ಯವಿದ್ದವರಿಗೆ ಕಸಿ ಮಾಡಲಾಗಿದ್ದು, ನಾಲ್ಕು ಜನರ ಜೀವ ಉಳಿಸಲು ನೆರವಾಗಿದೆ.
ಕೀರ್ತನ ಕುಟುಂಬದ ಮಾದರಿ ಕಾರ್ಯ
ಭದ್ರಾವತಿಯ ನೀಲಮ್ಮ ಮತ್ತು ಕುಮಾರ್ ದಂಪತಿಯ ಪುತ್ರಿ ಕೀರ್ತನ ಹಠಾತ್ ಆರೋಗ್ಯ ವೈಪರೀತ್ಯದಿಂದ ಅಕಾಲಿಕವಾಗಿ ಮೃತಪಟ್ಟಿದ್ದರು. ಮಗಳನ್ನು ಕಳೆದುಕೊಂಡ ದುಃಖದಲ್ಲೂ ಪೋಷಕರು ಅಂಗಾಂಗ ದಾನಕ್ಕೆ ಮುಂದಾದರು.
ಕೀರ್ತನ ಅವರ ಲಿವರ್, ಎರಡೂ ಮೂತ್ರಪಿಂಡಗಳು ಹಾಗೂ ಹೃದಯದ ಕವಾಟಗಳನ್ನು ಯಶಸ್ವಿಯಾಗಿ ಕಸಿ ಮಾಡಿ ನಾಲ್ಕು ಜನರ ಜೀವ ಉಳಿಸಲಾಗಿದೆ.
ಮಕ್ಕಳನ್ನು ಕಳೆದುಕೊಂಡ ನೋವಿನ ನಡುವೆಯೂ ಅಂಗಾಂಗ ದಾನದ ಮೂಲಕ ಇತರರಿಗೆ ಹೊಸ ಬದುಕು ನೀಡಿದ ಎರಡೂ ಕುಟುಂಬಗಳ ಮಾನವೀಯ ಸೇವೆಯನ್ನು ಗುರುತಿಸಿ ಸರ್ಕಾರ ಪ್ರಶಂಸನಾ ಪತ್ರ ನೀಡಿ ಗೌರವಿಸಿದೆ.
